بقلم الخبير السياحى/ محمود كمال
صباح الخير يا محافظ الفيوم ويا وزير البيئة ويا وزير السياحة ويا وزير الداخلية هل تسمعونى ،طيب الحمد لله ان صوتى مسموع عايز اقولكم حاجه مهمه أنا وادى الريان اللى فى الفيوم عارفينه طبعا ،ياريت تيجو تزورونى مرة علشان تتبسطو زى باقى المصريين اللى بيزورونى وبيتبسطوا جدا بس سألونى بعض الاسئلة وأنا وعدتهم أنى سوف أتصل بيكم وأسئلكم نفس الاسئلة بتاعتهم ووعدتهم بالرد السريع والاستجابة لمطالبهم الشرعية فى الاستمتاع بوادى الريان كمزار سياحى مهم جدا ومفيش زيه فى مصر كلها ودلوقتى هقولكم الحوار اللى دار بينا:
ليه يا وادى الريان معندكش حمام ادمى"تواليت" علشان نقضى حاجتنا؟
مين قال انه مفيش حمام ادمى"نواليت " موجود بس قليل جدا بالنسبة لعدد الزوار ، موجود بس مش نظيف ،
ليه يا وادى الريان معندكش ادوات نعمل بيها انشطة زى التزحلق على الرمال أو ركوب الخيل أو البالون الطائر ؟
لا عندى يا حبايبى كل حاجه بس مش بتاعتى هى بتاعة بعض الشركات اللى بتنفذ برامج سياحية وانا هشوف لكم الموضوع ده مع محافظ الفيوم هو المسئول الاول عنى وهو رجل كويس قوى مش هيتأخر فى عمل اى حاجه تبسطكو إحنا لينا مين غيركو نهتم بيه يا مصريين ده رئيس الدولة حابب يخليكو مبسوطتين على قد ما يقدر وأكيد أن المحافظ مش أقل وطنيه منه وأوعدكم انى اناقش معاه خطة تطويرى وتنميتى بطريقة علمية وسريعة وبسيطة لا تقلقوا بس ياريت تسيبو لى ارقام تليفوناتكم علشان اكلمكم واقول لكم نعالوا زورونى فى اليوم الفلانى يوم الافتتاح إن شاء الله.
ليه يا وادى الريان معندكش خيام نستريح فيها لما نعوز وعلشان نشعر إننا عملنا سفارى بجد ؟
طيب ،انا هاخد ده كمان فى الاعتبار علشان وجود خيام تقيكم من الشمس ده ضرورى جدا.؟
إحنا لما جينا نركب المراكب الصغيره للتنزه فى بحيرتك الجميله اتبهدلنا علشان مفيش سقاله نمشى عليها لحد المركب وركبنا بطريقة غير أدمية وعشوائية وكنا هنسقط فى الماء ، ليه ما تعملوش كام سقاله زى اللى شفناهم قبل كده فى شرم الشيخ أو الغردقه أو على الاقل تكون من الخشب على شكل كوبرى صغير جميل وكمان ينفع فى التصوير ويحمينا من السقوط فى الماء ويحافظ على ملابسنا من البهدله ؟
طبعا عندكم حق جدا وهشوف الموضوع ده برده ، وأنا مبسوط من الحوار معاكم لانكم بتفتحوا عيننا على كل حاجه تخلينى من أهم المعالم السياحية فى مصر واكيد الدخل هيزيد والشغل هيبقى طول السنه والكل يبقى مبسوط.
عايزين نسألك يا وادى عن جبل المدوره ليه مفيش خدمات فيه وليه ملوش طريق ممهد علشان الناس الكبيرة تقدر توصله بيسر ؟
جبل المدوره ممتع المنظر من فوقه وبتشوف منظر الوادى رائع من عنده وكمان غروب الشمس اكثر من رائع وبرده هاخد ده فى الحسبان إنه يكون فيه كل الخدمات الادمية علشان خاطر عيونكم؟
هو إحنا تقلنا عليك يا وادى بالاسئلة ؟
لا ابدا ده أنا مبسوط إنكم بتقولوا كل اللى انا نفسى فيه وأبقى حاجه كده محصلتش والدنيا كلها تيجى تستمع بيوم أو تبيت فى الخيام علشان انتو عارفين ان انا ضمن المحميات الطبيعية ولازم نلتزم بقواعد واصول المحميات بس ده مش معناه الاهمال من المسئولين عنا.
بس أنا كمان لى طلب عندكم ان انتو تسيبو المكان نظيف علشان المظهر الحضارى بتاعى يبقى على اعلى مستوى انا مش اقل من اى مكان حضارى فى اى مكان تانى.
طيب كويس انك جبت سيرة النظافة دى إحنا ملقناش سلة مهملات واحده فى الوادى علشان نرمى فيه ، طيب خليك يا وادى جاهز ونظيف وإحنا نوعدك نلتزم بقواعدك ونحافظ عليك كمان ونخليك مبسوط منا زى ما انت عايز تبسطنا .
نفسنا نشوفك جميل وانت جميل فعلا بس نفسنا نشوف الصورة كاملة مش ناقصها حاجة علشان إحنا بنحبك وبنحب البلد دى كان لازم نتكلم معاك يا وادى يا حبيبنا وبجد إحنا اتبسطنا بمقابلتك ومستنيين الكتير من محافظ الفيوم الرجل النشيط ده واكيد الدنيا هتبقى جميله لو كل واحد عمل دوره صح من غير ملل ولا كسل.
|
